Image alternative text, required
Qeyri-formal və informal təhsil istiqamətində təltifetmə mərasimi keçirilib
Title

3 aprel 2025-ci il tarixində Təhsildə Keyfiyyət Təminatı Agentliyində (TKTA) “Aşpaz” və “Qənnadçı, şirniyyatçı” peşə ixtisasının qiymətləndirilməsi prosesində uğurlu nəticə əldə etmiş ərizəçilərin təltifedilməsi həyata keçirilib.

Tədbirdə TKTA-nın Qeyri-formal və informal təhsilin tanınması şöbəsinin müdiri Mansur Rəhimli çıxış edərək peşə sənədi əldə edən ərizəçiləri təbrik edib, formal təhsilə çıxış imkanı məhdud olan, müxtəlif peşə sahələrində çalışan vətəndaşların bilik, bacarıq, təcrübə və səriştələrinin tanınmasının əmək bazarındakı dəyişikliyə müsbət təsiri və ölkə iqtisadiyyatının inkişafı üçün əhəmiyyətini qeyd edib.  

Sertifikasiya imtahanında iştirak üçün 17 nəfər namizəd müraciət edib. “Qənnadçı, şirniyyatçı” peşə ixtisası üzrə praktiki imtahanda iştirak edən 1 nəfərin nəticəsi uğursuz olub. “Aşpaz” peşə ixtisası üzrə 3, “Qənnadçı, şirniyyatçı”  peşə ixtisası üzrə isə 13 nəfər uğur qazanıb.

Məlumat üçün bildiririk ki, TKTA tərəfindən qeyri-formal və informal yollarla əldə edilmiş bilik, bacarıq, səriştə və təcrübənin qiymətləndirilməsi və tanınması prosesi iki mərhələli şəkildə həyata keçirilir. İlk mərhələdə nəzəri imtahanı uğurla keçən ərizəçilər ikinci mərhələdə praktiki bacarıqların qiymətləndirilməsi mərhələsində iştirak hüququ əldə edirlər.

Hər iki mərhələdə uğur qazanan şəxslər müvafiq peşə ixtisası üzrə sənədlə təltif olunurlar.

Qeyri-formal və informal təhsilin tanınması Azərbaycan Respublikası Nazirlər Kabinetinin 5 avqust 2020-ci il tarixli 279 nömrəli qərarı ilə təsdiq edilmiş "Qayda" əsasında tənzimlənir və əldə edilən peşə ixtisasını təsdiq edən sənəd vətəndaşa əmək fəaliyyətinə başlamaq hüququ verir.

Qeyd edək ki, hazırda peşə ixtisasları üzrə imtahan qeydiyyatı davam edir. Vətəndaşlarımız ətraflı məlumat əldə etmək üçün müvafiq keçiddən istifadə edərək, həmin imtahanlar üzrə qeydiyyatdan keçə bilərlər.