Ekspert təlimləri

Azərbaycan Respublikası Prezidentinin 29 dekabr 2019-cu il tarixli 907 nömrəli Fərmanı ilə təsdiq edilmiş “Təhsildə Keyfiyyət Təminatı Agentliyinin Nizamnaməsi”nin və Azərbaycan Respublikası Nazirlər Kabinetinin 14 dekabr 2020-ci il tarixli 493 nömrəli qərarı ilə təsdiqlənmiş “Təhsil müəssisələrinin akkreditasiyası Qaydaları”nın müvafiq müddəalarına uyğun olaraq təhsil müəssisələrinin akkreditasiyasının həyata keçirilməsi nəzərdə tutulub.

Təhsil müəssisələrinin akkreditasiya qiymətləndirilməsi Agentlik tərəfindən yaradılan və ödənişli əsaslarla fəaliyyət göstərən sertifikatlaşdırılmış ekspertlərdən ibarət olan Akkreditasiya Komissiyası tərəfindən həyata keçirilir.

Akkreditasiya Komissiyası üçün ekspertlərin hazırlıq prosesi  Təlim və metodologiya şöbəsi tərəfindən aparılır. Bugünə qədər ekspert bankına 1000-dən çox namizəd müraciət edib. Təlimlər 3 moduldan ibarətdir və interaktiv tədris metodları əsasında təşkil edilir. Təlimlərdə “Ali təhsil müəssisəsinin institusional akkreditasiyası üzrə qiymətləndirmə Meyarları” və “Ali təhsil müəssisəsinin proqram akkreditasiyası üzrə qiymətləndirmə Meyarları” və keyfiyyət təminatı ilə bağlı  digər məsələlər haqqında geniş məlumat verilir və gələcəkdə təhsil müəssisələrinin akkreditasiya prosesinə cəlb olunacaq ekspertlərin mövcud sahədə bilik və bacarıqlarının artırılmasına dəstək göstərilir.

 Vəzifə öhədliyi

Akkreditasiya Komissiyasının fəaliyyətində iştirak etmək və müvafiq qanunvericiliyin tələblərinə uyğun olaraq təhsil müəssisələrinin fəaliyyətinin və təhsil proqramlarının icrasının qiymətləndirilməsini apararaq tələb olunan keyfiyyətdə Yekun Hesabatın hazırlanmasında iştirak etmək. 

 Məsuliyyəti

1. Akkreditasiya prosesinə hazırlıq mərhələsində Agentlik tərəfindən təşkil olunan müvafiq təlimlərdə iştirak etmək;
2. Təhsil müəssisəsinin Özünütəhlil Hesabatını və əlavə olunan digər müvafiq sənədləri təhlil etmək;
3. Təhsil müəssisəsinin Özünütəhlil Hesabatında və əlavə olunan digər müvafiq sənədlərdə göstərilən məlumatların məsafədən və ya yerində qiymətləndirməsini həyata keçirmək;
4. Təhsil müəssisəsinin fəaliyyətində maraqlı şəxslər (tələbələr, məzunlar, müəssisənin işçi heyəti, işəgötürənlər və s.) ilə müsahibələr keçirmək;
5. Yekun Hesabatı hazırlayıb Agentliyə təqdim etmək;
6. Akkreditasiya qiymətləndirilməsi zamanı qanunauyğunsuzluq aşkar etdikdə, bu barədə Agentliyə məlumat vermək;
7. Əsas prosessual məsələlərin müzakirəsinə dair sənədləşməni təmin etmək;
8. Yekun Hesabatın elektron surətini müzakirə üçün “Təhsil Mərkəzləşdirilmiş İnformasiya Sistemi”ndə (TMİS) “Təhsil müəssisələrinin akkreditasiyası” elektron informasiya altsisteminə yükləmək və təsdiq olunmuş surətini Agentliyə təqdim etmək;
9. Akkreditasiya proses ilə bağlı razılaşdırılmış son icra tarixlərinə riayət etmək;
10. Təhsil müəssisəsinin apellyasiya şikayəti zamanı dinləmələrdə iştirak etmək və Komissiyanın fəaliyyəti barədə Apellyasiya Komissiyasına hesabat vermək;
11. Apellyasiya Komissiyasının qərarına əsasən Yekun Hesabata müvafiq dəyişikliklər etmək və bu barədə Agentliyi məlumatlandırmaq.

 Namizədə olan tələblər

1. Ali təhsilli;
2. Ali və ya orta ixtisas təhsili sahəsində minimum 3 (üç) il iş təcrübəsi;
3. Daxili keyfiyyət təminatı sahəsində məlumatlı olması;
4. Strateji planlama və innovasiya, elmi fəaliyyətin təşkili, maliyyə və insan resurslarının idarə olunması, tədrisin təşkili və idarə olunması kimi sahələrin ən azı biri üzrə təcrübəsinin olması;
5. Yüksək səviyyədə Azərbaycan dili biliyi;
6. Microsoft Office proqramlarını (xüsusilə “Power Point” və “Excel”) yüksək səviyyədə bilmək və internet resurslarından istifadə bacarığı;
7. Effektiv şifahi və yazılı peşəkar kommunikasiya bacarığı;
8. Analitik, strateji düşünmə və problem həlletmə bacarığı;
9. Monitorinq və qiymətləndirmə bacarığı;
10. Təşkilatçılıq bacarığı.

Qeyd: 

1. Seçilmiş ekspertlər xidməti müqavilə əsasında fəaliyyətə cəlb olunacaqdır.
2. Akkreditasiya Komissiyasının fəaliyyətində iştirak etməyə haqq qazanmış namizədlərə təlimlərin keçirilməsi və onların sertifikatlaşdırılması planlaşdırılır.

Ekspert bankına üzv olmaq üçün link vasitəsi ilə qeydiyyatdan keçin.

QEYD: Yalnız yuxarıda qeyd edilən tələblərə uyğun olan namizədlərlə əlaqə saxlanılacaqdır.

Təhsil müəssisələrinə təlim və metodoloji dəstək xidmətləri

Təhsildə Keyfiyyət Təminatı Agentliyi öz Nizamnaməsinə uyğun olaraq təhsil müəssisələrinin akkreditasiyasının həyata keçirilməsi üçün tövsiyələr hazırlayır və təlimlər təşkil edir. Agentlik həmçinin təhsil müəssisələrində daxili keyfiyyət təminatı sistemlərinin qurulması və inkişaf etdirilməsi ilə bağlı metodiki dəstək göstərir. Bu zamana qədər 20-dən çox ali təhsil müəssisəsinə və 4-dən çox orta ixtisas təhsili müəssisəsinə daxili və xarici keyfiyyət təminatı ilə əlaqəli müxtəlif təlimlər təşkil olunub və iştirakçılar sertifikatla təltif olunublar. Onu da qeyd etmək lazımdır ki, şöbənin metodiki dəstək fəaliyyəti çərçivəsində 1 ali təhsil müəssisəsinə metodiki və 1 ali təhsil müəssisəsinə qrant layihəsi çərivəsində xarici keyfiyyət təminatı nöqteyi-nəzərdən dəstək göstərilib.

Təlim və metodologiya şöbəsi keyfiyyət təminatı mövzusunda fərdlərin səriştələrinin artırılması məqsədi ilə xarici ölkələrdən mütəxəssislər cəlb etməklə konfrans, müşavirə, seminar, təlim və digər tədbirlər təşkil edir.

Şöbə institusional və proqram akkreditasiya qiymətləndirilməsi aparacaq Akkreditasiya Komissiyalarının sədr və üzvləri üçün məlumatlandırıcı sessiyalar təşkil edir.

Müvafiq qanunvericiliyə uyğun olaraq hər bir təhsil səviyyəsi və pilləsi üzrə tədris aparan tabeliyindən, təşkilati hüquqi formasından və mülkiyyətindən asılı olmadan bütün təhsil müəssisələrini müvafiq istiqamətlər üzrə təlim xidmətlərinin göstərilməsinə dair əməkdaşlığa dəvət edirik. Əməkdaşlıq etmək arzusunda olan və (və ya) daha ətraflı məlumat almaq üçün info@tkta.edu.az elektron poçt ünvanı vasitəsilə əlaqə saxlaya bilərsiniz.